हिंगोली- जिल्ह्यात झालेल्या अतिवृष्टीच्या पार्श्वभूमीवर पाहणी करण्यासाठी काँग्रेस नेते अमित देशमुख हिंगोली जिल्हा दौऱ्यावर आले होते. या दौऱ्याप्रसंगी त्यांनी माजी आमदार भाऊराव पाटील गोरेगावकर यांच्या सोबत दाखविलेली सलगी पक्षातील इच्छुकांच्या पोटात गोळा निर्माण करणारी ठरली आहे.
स्वर्गीय माजी मुख्यमंत्री विलासराव देशमुख आणि भाऊराव पाटील गोरेगावकर यांच्यातील सख्ख्य सर्वश्रुत आहे. विलासराव देशमुख यांचे मराठवाड्यातील सर्वात खंदे समर्थक म्हणून भाऊराव पाटील गोरेगावकर ओळखले जात होते. विलासरावांच्या मृत्यूनंतर मराठवाड्यातील काँग्रेसची धुरा बहुतांशपणे अशोक चव्हाण यांच्याकडे आली होती. परंतु लोकसभेच्या पार्श्वभूमीवर चव्हाण यांनी भाजपचा रस्ता धरला आणि मराठवाड्यातील काँग्रेसची सूत्रे पुन्हा लातूरच्या देशमुख घराण्याकडे आली. त्यातूनच अमित देशमुख यांना काँग्रेसने मराठवाड्याचे निवडणूक निरीक्षक म्हणून जबाबदारी देखील दिली आहे. हिंगोली विधानसभेमध्ये सध्या काँग्रेसमध्ये इच्छुकांचे पेव फुटले आहे. यामध्ये ताकदीने निवडणूक लढवून जिंकून येण्याच्या महत्त्वकांक्षा पेक्षा केवळ गोरेगावकरांची उमेदवारी रद्द करण्यासाठीची धडपड अधिक दिसून येत आहे. या सर्व पार्श्वभूमीवर नुकसानग्रस्त भागाची पाहणी करण्यासाठी येत असलेल्या अमित देशमुख यांच्या दौऱ्याला महत्त्व प्राप्त झाले होते. हिंगोलीतील आपल्या पूर्ण दौऱ्या दरम्यान अमित देशमुख यांनी इच्छुकांच्या गर्दीला सारून माजी आमदार भाऊराव पाटील गोरेगावकर यांच्यासोबत दौरा केला. एवढेच नव्हे तर गोरेगावकर यांचे निवासस्थानी भोजन देखील स्वीकारले. त्यानंतर झालेल्या पत्रकार परिषदेत त्यांनी गोरेगावकर यांचा काँग्रेसचे नेते म्हणून उल्लेख केला तर जिल्ह्यातील गटबाजीवर विचारलेल्या प्रश्नाला उत्तर देताना त्यांनी गटबाजीच्या चर्चेचे खापर माध्यमांवर फोडून टाकले. असे असले तरीही अमित देशमुख यांनी विलासराव देशमुख यांची परंपरा चालवीत गोरेगाव यांच्याशी दाखविलेली सलगी इच्छुकांच्या मात्र पोटात गोळा आणणारी ठरली आहे.
