हिंगोली – विधानसभा निवडणुकीमध्ये भारतीय जनता पार्टीने धनगर समाजाचे नेते म्हणून माजी आमदार रामराव वडकुते यांना उमेदवारी द्यावी अशी मागणी युवा मल्हार सेनेच्या वतीने रावसाहेब दानवे यांच्याकडे करण्यात आली आहे.
हिंगोली विधानसभेत धनगर समाजाचे निर्णायक मतदान असून धनगर समाजाचे नेते म्हणून भारतीय जनता पार्टीने रामराव वडकुते यांना उमेदवारी द्यावी अशी मागणी युवा मल्हार सेना मराठवाडा अध्यक्ष वैजनाथ पावडे यांनी हिंगोली दौऱ्यावर आलेल्या रावसाहेब दानवे यांच्याकडे केली. धनगर समाजाचा विचार करून भाजपने ही उमेदवारी द्यावी अन्यथा युवा मल्हार सेना भारतीय जनता पार्टीचे नेत्यांना काळे झेंडे दाखवून निषेध करेल असा इशारा देखील वैजनाथ पावडे यांनी दिला आहे. हिंगोली विधानसभेवर रामराव वडकुते यांच्या दाव्यामुळे भाजपमध्ये आणखी चुरस निर्माण झाली आहे. पक्ष या मागणीला कसे न्याय देतो याकडे लक्ष लागले आहे.
