हिंगोली- विधानसभा निवडणूक जशी जशी जवळ येत आहे तशी राजकीय हालचाल देखील दिवसेंदिवस वाढू लागली आहे. भाजपमध्ये इच्छुक म्हणून सक्रिय असलेले रामदास पाटील सुमठाणकर यांनी नुकतेच जनसेवा कार्यालय लोकार्पण केले. पाटलांनी या माध्यमातून उमेदवारीच्या शर्यतीत एक पाऊल पुढे टाकल्याची चर्चा भाजप गोटात ऐकावयास मिळत आहे.
हिंगोली विधानसभेमध्ये भाजप अंतर्गत इच्छुकांची यादी मोठी आहे. विद्यमान आमदार तानाजी मुटकुळे यांच्यासह रामदास पाटील, रामराव वडकुते, गजानन घुगे, शिवाजीराव माने अशा अनेकांनी हिंगोली विधानसभेसाठी इच्छा व्यक्त केली आहे. ज्यामध्ये लोकसभेला प्रभावी इच्छुक असलेले रामदास पाटील यांनी हिंगोली विधानसभेत आपली दावेदारी प्रबळ करीत मतदारसंघ पिंजून काढला आहे. लवकरच आचारसंहिता जाहीर होईल त्यानंतरच भाजपच्या उमेदवारीची यादी देखील जारी केली जाईल. हिंगोली विधानसभेमध्ये भारतीय जनता पार्टी विद्यमान आमदार तानाजी मुटकुळे यांनाच पुन्हा संधी देणार ? की यावेळी चेहरा बदल होणार ? अशा शक्यता अशक्यतांच्या बाबतीत चर्चा सुरू असताना रविवारी रामदास पाटील यांनी त्यांच्या भव्य आणि सुसज्ज अशा जनसेवा कार्यालयाचे लोकार्पण केले. रामदास पाटील यांच्या या उपक्रमामुळे भारतीय जनता पार्टी अंतर्गत चर्चेला चांगलेच देव फुटले आहे. अद्याप उमेदवारीच्या बाबतीत कुठलीही स्पष्टता नसताना रामदास पाटील यांनी धाडसाने टाकलेल्या या पावलाबद्दल अनेकांना आश्चर्याचा धक्का बसला आहे. कार्यालय उद्घाटनानिमित्त भाजपातील सर्व नेते मंडळी उपस्थित होती परंतु उमेदवारीच्या बाबतीत पाटलांना पाटलांना शाश्वती आली का काय? असा प्रश्न देखील अनेकांच्या मनात निर्माण झाला होता.
