हिंगोली – भारतीय जनता पार्टीचे उमेदवार तानाजी मुटकुळे यांनी आज त्यांच्या प्रचारार्थ सेनगाव शहरात भव्य प्रचार रॅली काढली. या रॅलीला सेनगावकरांचा उत्स्फूर्त प्रतिसाद मिळाला.
महायुतीचे भारतीय जनता पार्टीचे उमेदवार तानाजी मुटकुळे यांनी आज शनिवारी सेनगाव येथे मुख्य मार्गावरून आपली प्रचार रॅली काढली. या रॅलीमध्ये त्यांच्यासह माजी आमदार रामराव वडकुते, जिल्हाध्यक्ष फुलाजी शिंदे, केके शिंदे, युवा जिल्हाध्यक्ष पप्पू चव्हाण, आप्पासाहेब देशमुख, खाडे, हिम्मत राठोड, पद्माकर नायक यांच्यासह भारतीय जनता पार्टीचे पदाधिकारी व कार्यकर्ते सहभागी झाले होते.
रॅलीचे ठिकठिकाणी ढोल ताशाच्या पथकासह जंगी स्वागत करण्यात आले. महिलांनी उमेदवार मुटकुळे यांचे औक्षण करून स्वागत केले. सेनगाव शहरांमध्ये प्रथमच अशी भव्य दिव्य रॅली पार पडली. रॅलीमध्ये शेकडो नागरिक व कार्यकर्त्यांनी सहभाग नोंदविला होता. तानाजी मुटकुळे यांच्या समर्थनार्थ कार्यकर्त्यांनी प्रचंड घोषणाबाजी केली. यामुळे संपूर्ण बाजारपेठ दणाणून निघाली होती. रॅलीमध्ये महिला भगिनींनी देखील लक्षणीय उपस्थिती दर्शविली होती. जनतेच्या याच पाठबळावर आपण तिसऱ्यांदा विजय मिळवून विकासाचा मार्ग असाच कायम ठेवू अशी प्रतिक्रिया यावेळी तानाजी मुटकुळे यांनी दिली. आज शहरात पार पडलेली रॅली चर्चेचा विषय ठरली होती.
