हिंगोली- शेतकऱ्यांच्या विविध मागण्यांसह जिल्ह्यातील अनेक प्रश्नांच्या संदर्भात काँग्रेस पक्षाच्या वतीने प्रदेशाध्यक्ष हर्षवर्धन सपकाळ यांच्या नेतृत्वाखाली दिनांक 9 मार्च रोजी कळमनुरी येथील लमानदेव येथून पदयात्रेचे आयोजन करण्यात आले आहे. या पदयात्रेचा समारोप हिंगोली येथील गांधी चौक परिसरात भव्य सभेमध्ये करण्यात येणार असल्याची माहिती पत्रकार परिषदेत जिल्हा निरीक्षक साहेबराव कांबळे यांनी दिली.
मोदी सरकारने अमेरिकेसोबत केलेल्या करारामुळे शेतकरी बांधवांवर अन्याय होणार असून सोयाबीन, कापूस, तूर, ऊस, डेअरी प्रॉडक्ट, लघुउद्योग यांचे भाव कोसळणार आहेत. त्यामुळे अमेरिकेसोबत केलेला करार रद्द करण्यात यावा. माननीय सर्वोच्च न्यायालयाच्या निर्देशानुसार आदिवासी विशेष पदभरती तात्काळ करून १२५०० जागा भराव्यात. शक्तीपीठ महामार्ग रद्द करण्यात यावा. शबरी घरकुल योजना, रमाई घरकुल योजना व प्रधानमंत्री घरकुल योजनेचा निधी लाभार्थ्यांच्या खात्यावर पडलेला नाही. त्यामुळे घरकुल लाभार्थी आर्थिक संकटात सापडलेले आहेत. घरकुल योजनेचा निधी लाभार्थ्यांच्या खात्यावर पडलेला नाही. महात्मा गांधी रोजगार हमी योजनेमध्ये पांदण रस्ते, सिंचन विहिरी, गोठे व इतर रोजगार हमी योजनेची कामे राज्यात थांबविण्यात आलेले आहेत, त्यामुळे पूर्वीप्रमाणे सर्व योजना चालू ठेवण्यात याव्यात. वनहक्क कायद्याची अंमलबजावणी योग्य पद्धतीने करून वनपट्टी धारकांची नावे जमिनी कराव्यात. कयाधू नदीचे पाणी वळवून इसापूर धरणामध्ये सोडण्यात येणार आहे, यामुळे कयाधू नदीकाठच्या गावांना तीव्र पाण्याची टंचाई भासणार आहे. त्यामुळे कयाधू नदीचे पाणी वळविण्याचा हा प्रकल्प रद्द करण्यात यावा. औंढा तालुक्यातील बोरजा फाटा ते लिगो प्रकल्प हा रस्ता ऐंशी फुटाचा होत आहे. जमीन अधिग्रहण करताना शेतकऱ्यांना योग्य मोबदला देण्यात यावा. कळमनुरी तालुक्यातील रामवाडी मुंडळ उपसा जलसिंचन योजनेला तात्काळ मंजुरी देऊन काम सुरू करण्यात यावे. पीक विमा सरसकट शेतकरी बांधवांना देण्यात यावा. कर्जमाफीचे आश्वासन शासनाने पाळावे, कर्जमाफी तात्काळ करावी. पीक कर्ज वाटप दरवर्षी १००% झाले पाहिजे. या मागण्यांसाठी कळमनुरी येथून पदयात्रा तिच्यासमोर हिंगोली येथील गांधी चौक परिसरात करण्यात येईल.
या पत्रकार परिषदेला सचिन नाईक, सुरेश अप्पा सराफ, डॉक्टर रमेश शिंदे, मिलिंद उबाळे, एकनाथ शिंदे यांच्यासह पदाधिकारी उपस्थित होते.
