हिंगोली:
हिंगोली जिल्ह्याच्या दीर्घकालीन आणि सर्वांगीण विकासाला गती देण्यासाठी हिंगोली जिल्हा मराठी पत्रकार संघाच्या वतीने ‘व्हिजन २०४७’ या विशेष कार्यक्रमाचे नियोजन करण्यात येणार आहे. या कार्यक्रमाच्या निमंत्रणाबाबत व वेळ मिळण्याबाबत पत्रकार संघाच्या प्रतिनिधी मंडळाने मुंबई येथे राज्याचे पालकमंत्री नामदार नरहरीजी झिरवाळ यांची प्रत्यक्ष भेट घेऊन निवेदन सादर केले.
पंतप्रधान नरेंद्र मोदी आणि राज्याचे नेतृत्व देवेंद्र फडणवीस यांच्या मार्गदर्शनाखाली देश व राज्य पातळीवर २०४७ च्या विकसीत भारताचा आराखडा तयार करण्याचे काम वेगाने सुरू आहे. याच धर्तीवर हिंगोली जिल्ह्याचाही आगामी वर्षांतील विकासाचा आराखडा तयार व्हावा, या उद्देशाने पत्रकार संघाने हा पुढाकार घेतला आहे. यापूर्वी तत्कालीन पालकमंत्री श्रीमती वर्षाताई गायकवाड यांच्या उपस्थितीत पत्रकार संघाने ‘व्हिजन २०२०’ उपक्रम यशस्वीपणे राबवून जिल्ह्याच्या विकासाच्या विविध संकल्पना संकलित केल्या होत्या.
आता ‘व्हिजन २०४७’ च्या माध्यमातून जिल्ह्यातील लोकप्रतिनिधी, सामाजिक व राजकीय संघटना तसेच विकासप्रेमी नागरिकांना एकाच मंचावर आणून त्यांच्याकडून हिंगोलीच्या प्रगतीबाबत संकल्पना जाणून घेतल्या जाणार आहेत. या कार्यक्रमाच्या नियोजनासाठी आणि उद्घाटनासाठी पालकमंत्र्यांनी तारीख व वेळ द्यावी, अशी विनंती निवेदनाद्वारे करण्यात आली.
मुंबई येथील या भेटीदरम्यान जिल्ह्यातील विकासासंदर्भात संकलित करण्यात आलेल्या महत्त्वपूर्ण टिप्पण्यांची प्रत पालकमंत्र्यांना सुपूर्द करण्यात आली. निवेदनाची दखल घेत, जिल्ह्याच्या दीर्घकालीन नियोजनासाठी हा कार्यक्रम अत्यंत महत्त्वपूर्ण ठरेल, असे सांगत लवकरच या कार्यक्रमासाठी वेळ निश्चित केली जाईल, असे आश्वासन पालकमंत्री ना. नरहरीजी झिरवाळ यांनी दिले.
या प्रसंगी हिंगोली जिल्हा मराठी पत्रकार संघाचे परिषद प्रतिनिधी नंदकिशोर तोष्णीवाल, कार्याध्यक्ष वसंत भट, तसेच ज्येष्ठ पत्रकार तुकाराम झाडे (लोकसत्ता), शिवाजी मेटकर (दै. देशोन्नती), मकरंद बांगर (नवभारत व नवराष्ट्र), प्रद्युम्न गिरीकर (न्यूज माध्यम), श्याम सोळंके (पुण्यनगरी) आणि वत्सल दगडू (गाववाला) हे उपस्थित होते.
