हिंगोली- विधानसभेतील अपक्ष उमेदवार रामदास पाटील सुमठाणकर यांनी प्रचारामध्ये जोरदार मुसंडी घेत हिंगोली शहरासह ग्रामीण भागातील अनेक गावांमध्ये कॉर्नर सभा, रॅली काढून जोरदार शक्ती प्रदर्शन केले. यामुळे निवडणुकीच्या प्रचारात चांगलीच रंगत चढू लागली आहे.
भारतीय जनता पार्टी कडून इच्छुक असलेले रामदास पाटील यांनी अखेर अपक्ष म्हणून या निवडणुकीत आपला षड्डू ठोकला आहे. कपाट या निवडणूक चिन्हावर ते निवडणूक लढवीत आहेत. त्या अनुषंगाने त्यांनी हिंगोली शहरासह ग्रामीण भागामध्ये प्रचाराचा झंजावात निर्माण केला आहे. ग्रामीण भागातील त्यांच्या प्रचाराला नागरिकांचा उत्स्फूर्त प्रतिसाद देखील मिळू लागला आहे.
रामदास पाटील यांनी पुसेगाव सर्कल मध्ये पुसेगाव, खिल्लार, आडोळ, खुडज या गावांमध्ये प्रचार दौरा केला.
यावेळी नागरिकांनी ढोल ताशाच्या पथकासह आतिषबाजी करीत त्यांचे स्वागत केले. शिवाय या निवडणुकीत तुमच्या पाठीशी खंबीरपणे उभे राहू असे आश्वासन देखील गावकऱ्यांनी दिले आहे. सुरुवातीच्या काळात प्रचारात शांतता ठेवणारे पाटील यांनी यावेळी मात्र अचानक मुसंडी मारली आहे. ग्रामीण भागात त्यांना मिळणारा प्रतिसाद हा उल्लेखनीय असल्याचे दिसून येत आहे. सेनगाव येथील अनेक शिवसैनिक व पदाधिकारी यांनी त्यांना उघडपणे पाठिंबा जाहीर केला आहे.
ही विधानसभा जनतेने हातात घेतलेली आहे आणि जनताच मला विक्रमी मतांनी विजयी करेल असा विश्वास त्यांनी व्यक्त केला. समाज माध्यमांवर त्यांना मिळणाऱ्या प्रतिसादाचे फोटो देखील मोठ्या प्रमाणात व्हायरल होऊ लागले आहेत.
