हिंगोली- महायुतीचे उमेदवार तानाजी मुटकुळे यांनी आज पत्रकार परिषद घेत हिंगोली विधानसभे करिता स्वतःचा संकल्प पत्र जाहीर केला.
महायुतीच्या अंतर्गत भारतीय जनता पार्टीच्या वतीने नुकताच राज्याचा संकल्प पत्र जारी करण्यात आला. त्या पाठोपाठ आज हिंगोली विधानसभेचे भारतीय जनता पार्टीचे उमेदवार तानाजी मुटकुळे यांनी पत्रकार परिषद घेऊन आपला संकल्पपत्र जाहीर केला. त्या अनुषंगाने हिंगोली शहराकरिता नुकतीच 84 कोटी रुपयांची स्वतंत्र पाणीपुरवठा योजना मंजूर करण्यात आली असून ती येत्या पाच वर्षात पूर्ण केल्या जाईल. त्याचबरोबर पैनगंगा नदीवरील अकरा बंधार्‍यांसाठी 787 कोटी रुपयांच्या सुधारित खर्चाला मंजुरी मिळाली आहे. हिंगोली येथील प्रस्तावित मेडिकल कॉलेज देखील सुरू करण्यात आले आहे. उर्वरित महापुरुषांचे स्मारक हिंगोली शहर व सेनगाव शहरात उभे करण्यात येणार आहे. बासंबा व रिसाला बाजार रेल्वे उड्डाणपूल देखील येत्या पाच वर्षांमध्ये पूर्ण केल्या जाईल. हिंगोली शहरातील सिरेहक शाह बाबा तलावाचे सुशोभीकरण करण्यात येणार आहे. इंदिरा फुले नाट्यगृह व खुराणा पेट्रोल पंप समोरील जागा विकसित करण्यात येईल. अग्रसेन चौक ते नरसी चौक व स्वर्गीय नानाजी देशमुख उड्डाणपूल चौपदरीकरण देखील करण्यात येईल. कयाधू नदीवरील उड्डाणपूल बांधण्यात येईल. संत भगवान बाबा उद्यान विकासाकरिता शासनाकडून एक कोटी 15 लक्ष मंजूर करून सदरील कामाचे भूमिपूजन देखील करण्यात आले आहे.
येलदरी धरणातून डावा कालवा काढून सेनगाव तालुक्याची सिंचन व्यवस्था करण्यात येईल. गाव तेथे व्यायामशाळा, क्रीडांगण, वाचनालय व स्मशानभूमी उभारण्यात येईल. शेतीकडे जाणारे पाणंद रस्ते 100% करण्यात येतील तसेच आवश्यक त्या ठिकाणी गावांमध्ये जोड रस्ते निर्माण करण्यात येतील. अशी घोषणा त्यांनी संकल्प पत्राच्या माध्यमातून केली. या पत्रकार परिषदेला माजी आमदार रामराव वडकुते, जिल्हाध्यक्ष फुलाजी शिंदे, माजी नगराध्यक्ष बाबाराव बांगर, दुर्गादास साकळे यांची उपस्थिती होती.
