कळमनुरी – गद्दार विकल्या जात असतो निष्ठावान विकल्या जात नाही. त्यामुळे आजही माझ्यासोबत असलेले निष्ठावान गद्दारांना अशा रसातळाला नेऊन पोचवतील की त्यांनी स्वप्नात देखील पुन्हा गद्दारीचा विचार करू नये अशी टीका शिवसेना उद्धव बाळासाहेब ठाकरे गटाचे पक्षप्रमुख उद्धव ठाकरे यांनी कळमनुरी येथील जाहीर सभेमध्ये बोलताना केली.
विधानसभा निवडणुकीच्या पार्श्वभूमीवर उमेदवार संतोष टार्फे यांच्या प्रचारार्थ आयोजित असलेल्या सभेमध्ये उद्धव ठाकरे यांनी घानाघाती भाषण केले. मी या ठिकाणी गुंडगिरीवर नांगर फिरवायला आलो आहे. अशा गद्दार लोकांना उमेदवारी देताना मला यांची लायकी माहिती नव्हती. उमेदवारी देणे ही माझीच चूक होती आणि त्याबद्दल मी जनतेची माफी मागतो. परंतु मला या व्यक्तींचे नाटक नंतर माहीत होत गेली. पैशाने विकल्या गेलेले हे गद्दार पुन्हा निवडून येऊ देऊ नका. माझ्या कार्यकाळामध्ये या जिल्ह्याला न्याय देण्याचे काम मी केले, हळद संशोधन केंद्र तात्काळ मंजूर करण्याचे काम माझ्या हातून झाले. परंतु त्यानंतर या गद्दार सरकारने महाराष्ट्रात केवळ भ्रष्टाचाराचा विचार केला. हिंगोली सारख्या जिल्ह्यात आजही सिंचन बंधारे आणि शेतीपूरक उद्योगांची नितांत गरज असताना या ठिकाणी केवळ दादागिरी माजवण्यात आली. माझ्यासोबत असलेले निष्ठावान शिवसैनिक ही दादागिरी मोडून काढतील. महिलांना बहीण म्हणून जे पैसे देत आहात आणि त्याची जी जाहिरात करीत आहात याबद्दल तुम्हाला लाज वाटली पाहिजे. पैशातून बहीणचे मतदान विकत घेण्याचा हा प्रकार आहे. सत्ता स्थापनेनंतर गद्दार आणि गद्दार यांना मदत करणारे अशा सर्वांनाच आपण जेलची हवा दाखविणार असल्याची घोषणा देखील यावेळी उद्धव ठाकरे यांनी केली. या सभेला खासदार नागेश पाटील आष्टीकर, महाविकास आघाडीचे उमेदवार संतोष टार्फे, रूपालीताई पाटील गोरेगावकर, जयप्रकाश दांडेगावकर , आमदार प्रज्ञा सातव, संपर्कप्रमुख बबन थोरात, जिल्हाप्रमुख संदेश देशमुख, गोपू पाटील, विनायक भिसे यांच्यासह मोठ्या संख्येने शिवसेना पदाधिकारी व मतदार संघातून शेकडोंच्या संख्येने आलेले शिवसैनिक उपस्थित होते.
