हिंगोली- संपूर्ण राज्यांमध्ये अतिवृष्टी झाल्याने प्रचंड मोठे नुकसान झाले होते. या पार्श्वभूमीवर हिंगोली जिल्हा पोलीस दलातील सर्व अधिकारी व कर्मचाऱ्यांनी आपले एक दिवसाचे वेतन पूरग्रस्तांसाठी देत 23 लाख 81 हजार 222 रुपयांचा निधी मुख्यमंत्री सहायता निधीला दिला आहे. सदरील निधीचा धनादेश पोलीस अधीक्षक श्रीकृष्ण कोकाटे यांच्या हस्ते जिल्हाधिकाऱ्यांना सुपूर्त करण्यात आला.
राज्यातील काही भागात यावर्षी मोठ्या प्रमाणात अतिवृष्टी झाली. सदरील अतिवृष्टीमुळे शेतीचे प्रचंड मोठे नुकसान झाले आहे. तर काही ठिकाणी मालमत्तेची देखील मोठ्या प्रमाणात हानी झाली. या पार्श्वभूमीवर सामाजिक जाणीव ठेवून पोलीस अधीक्षक श्रीकृष्ण कोकाटे यांनी आवाहन केल्यानंतर जिल्हा पोलीस दलातील सर्व अधिकारी, अंमलदार व कर्मचारी यांनी स्वइच्छेने आपले एक दिवसाचे वेतन मुख्यमंत्री सहायता निधीसाठी दिले. त्यानुसार जिल्हा पोलीस दलातून तब्बल 23 लाख 81 हजार 222 रुपयांचा निधी संकलित झाला. सदरील निधीचा धनादेश पोलीस अधीक्षक श्रीकृष्ण कोकाटे यांनी जिल्हाधिकारी राहुल गुप्ता यांच्या कडे सुपूर्त केला. या प्रसंगी आमदार तानाजी मुटकुळे, भाजप जिल्हाध्यक्ष गजानन घुगे उपस्थित होते. यावेळी कोकाटे यांच्यासह अतिरिक्त पोलीस अधीक्षक कमलेश मीना, पोलीस उपअधीक्षक दत्ता केंद्रे, पोलीस निरीक्षक मोहन भोसले, कार्यालय अधीक्षक राणा पाटणकर यांची उपस्थिती होती. सामाजिक जाणीव ठेवून पोलीस दलाने केलेल्या या मदतीचे कौतुक होत आहे.
