हिंगोली- नगरपरिषद निवडणुकीच्या प्रचाराच्या अंतिम टप्प्यामध्ये भारतीय जनता पार्टीचे उमेदवार नीताताई बाबाराव बांगर यांच्या व भाजप नगरसेवक पदाच्या उमेदवारांकरिता राज्याचे मुख्यमंत्री देवेंद्र फडणवीस हे दुपारी चार वाजता जाहीर सभा घेणार असल्याची माहिती आमदार तानाजी मुटकुळे यांनी दिली. विशेष बाब म्हणजे यावेळी काही जणांचा पक्षप्रवेश होणार असल्याचे संकेत मिळाले आहेत.
नगरपरिषद निवडणुकीच्या निमित्ताने प्रत्येक प्रभागात नगरसेवक पदाचे उमेदवार व नगराध्यक्ष पदाच्या उमेदवारांनी प्रचाराचा जोर पकडला आहे. प्रत्यक्ष गाठीभेटी आणि कॉर्नर बैठकांच्या माध्यमातून मतदारांशी संवाद साधला जात आहे. याच पार्श्वभूमीवर प्रचाराच्या निमित्ताने भाजपच्या वतीने मुख्य स्टार प्रचारक थेट देवेंद्र फडणवीस यांची सभा लावण्यात आली आहे. दिनांक 27 नोव्हेंबर रोजी दुपारी चार वाजता गांधी चौक येथे ही सभा पार पडेल. या सभेला आदिवासी मंत्री अशोक उईके, जिल्ह्याच्या संपर्क मंत्री नामदार मेघनाताई बोर्डीकर यांच्यासह अनेक मान्यवरांची उपस्थिती राहणार आहे. या सभेच्या निमित्ताने फडणवीस काय बोलणार ? याकडे सर्वांचे लक्ष लागले आहे. कारण भाजपच्या प्रमुख विरोधात युतीतील शिवसेना शिंदे सेनेचे उमेदवार रेखा श्रीराम बांगर या मैदानात उतरलेल्या आहेत. त्यामुळे या सभेला महत्त्व प्राप्त झाले आहे. सभेच्या निमित्ताने काही महत्त्वाच्या नेत्यांचा भाजपमध्ये प्रवेश होणार असल्याची चर्चा देखील रंगू लागली आहे.
