हिंगोली- आमदार तानाजी मुटकुळे यांनी माझ्या घरी शंभर पोलीस पाठवले असा आरोप संतोष बांगर यांनी केल्यानंतर मुटकुळे यांनी त्यांना जोरदार प्रतिउत्तर दिले. नगरपालिकेच्या रणधुमाळी मध्ये दोन्ही आमदारांमध्ये जोरदार खडाजंगी होत असल्याचे दिसून येत आहे.
हिंगोली नगरपरिषद निवडणुक नगराध्यक्ष पदाच्या उमेदवारांपेक्षा कळमनुरीचे आमदार संतोष बांगर व हिंगोलीचे आमदार तानाजी मुटकुळे यांनी आपल्या प्रतिष्ठेची केली आहे. दोन्ही उमेदवारांच्या प्रचारार्थ या दोनच नेत्यांच्या प्रतिक्रिया उमटत आहेत. काल कॉर्नर सभेच्या वेळी बोलताना संतोष बांगर यांनी तानाजी मुटकुळे यांच्यावर आरोप करताना सांगितले की मुटकुळे यांनी माझ्या घराची तपासणी करण्याकरिता 100 पोलीस पाठवले. पोलिसांमुळे माझ्या कुटुंबीयांना त्रास सहन करावा लागला. घरातील फ्रिजची सुद्धा पोलिसांनी तपासणी केली. माझ्यासारख्या व्यक्तीला जर त्रास होत असेल तर सर्वसामान्य जनतेचे यापुढे काय होणार याचा विचार करा आणि महिला भगिनींनी तुमच्या भावाला झालेल्या त्रासाचा बदला घेऊन निवडणुकीत विरोधकांना जागा दाखवा असे आवाहन संतोष बांगर यांनी केले होते.
यावर आज आमदार तानाजी मुटकुळे यांनी जोरदार प्रतिक्रिया दिली. पोलिसांच्या रेकॉर्डवर ज्या लोकांच्या विरोधात गुन्हे दाखल आहेत अशा व्यक्तींच्या घरांची तपासणी करण्याचे काम संपूर्ण महाराष्ट्रभर सुरू आहे. निवडणूक प्रक्रिया शांततेत पार पडावी याकरिता अवैद्य शस्त्रे व इतर काही गोष्टी तपासणी करिता पोलिसांची ही मोहीम सुरू आहे. संतोष बांगर यांच्यावर यापूर्वी अनेक प्रकारचे गंभीर गुन्हे दाखल आहेत. त्या अनुषंगाने पोलीस त्यांच्या घरी तपासणीसाठी गेली होती. यात माझा काहीही संबंध नाही. पोलीस विभागात त्यांच्या नावावर असलेली रेकॉर्ड ही त्यांच्यासाठी कारणीभूत ठरत असल्याचे देखील मुटकुळे यांनी सांगितले.
