हिंगोली- भारतीय जनता पार्टी ही केवळ विकासाच्या मुद्द्यावर राजकारण करणारी पार्टी आहे. आम्हाला माल कमवायचा नाही तर जनतेचा विकास करायचा आहे. असे प्रतिपादन राज्याचे मुख्यमंत्री देवेंद्र फडणवीस यांनी हिंगोली येथील प्रचार सभेत केले.
नगरपालिका निवडणुकीच्या प्रचाराच्या पार्श्वभूमीवर हिंगोली कळमनुरी व वसमत येथील नगराध्यक्ष पदाचे उमेदवार व नगरसेवक पदाचे उमेदवारांच्या प्रचाराकरिता भाजपचे स्टार प्रचारक मुख्यमंत्री देवेंद्र फडणवीस यांची आज गांधी चौक येथे प्रचार सभा पार पडली. या सभेत बोलताना देवेंद्र फडणवीस म्हणाले की भारतीय जनता पार्टीच्या कार्यकाळामध्ये हिंगोलीचा अमुलाग्र विकास करण्यात आम्हाला यश आले. विकास कामे दर्जेदार व्हावी केवळ याच उद्देशाने आम्ही काम करत असतो. विस्तारित नळ योजना असेल, भूमिगत गटार योजना असेल किंवा शहरासाठी महत्त्वाकांक्षी प्रकल्प म्हणून जलेश्वर तलाव सुशोभीकरण असेल, तसेच शहरातील अंतर्गत रस्ते असतील अशा अनेक प्रकल्पांना आम्ही कोट्यावधी रुपयांचा निधी दिला आहे. वाढती लोकसंख्या आणि मूलभूत गरजा लक्षात घेता येणाऱ्या काळात देखील रोजगार निर्मिती, उद्योग निर्मिती तसेच नागरिकांच्या मूलभूत गरजा पूर्ण असेल यासाठी आम्ही बांधील आहोत. जनतेने आपल्या मताची किंमत ओळखून मतदान करणे गरजेचे आहे. आपण ज्यांना मतदान देत आहोत ते पाच वर्षाकरिता आपल्या शहराचे कारभारी आहेत याचे भान ठेवून भारतीय जनता पार्टीच्या उमेदवारांना विजयी करा. बाकी शहराच्या विकासासाठी लागणारी सर्वतोपरी मदत करण्याचे वचन देण्यासाठी मी या ठिकाणी आलो आहे आणि मला खात्री आहे भविष्यातील विकास हा दृष्टिकोन समोर ठेवून जनता 2 डिसेंबर रोजी कमळ चिन्हावर मतदान करून आम्हाला भरघोस मतांनी निवडून देईल. असा विश्वास देखील त्यांनी व्यक्त केला. या सभेला माजी मुख्यमंत्री तथा खासदार अशोक चव्हाण, राज्यमंत्री नामदार मेघनाताई बोर्डीकर, आमदार तानाजी मुटकुळे, जिल्हाध्यक्ष गजानन घुगे, हिंगोली नगराध्यक्षपदाचे उमेदवार नीताताई बाबाराव बांगर, कळमनुरीच्या उमेदवार वैशाली संजय कावडे, सुषमा शिवदास गोटेवार यांच्यासह नगरसेवक पदाचे उमेदवार यांची उपस्थिती होती. सभेला जनतेतून प्रचंड प्रतिसाद मिळाला.
