हिंगोली- नूतन जिल्हा पोलिस अधीक्षक जे श्रीधर यांनी पदभार स्वीकारल्यानंतर कारवाईचा धडाका सुरू ठेवला आहे. ज्यामध्ये विविध प्रकरणातील फरार आरोपींच्या शोधासाठी जिल्ह्यातील सर्व अधिकाऱ्यांमार्फत कोबिंग ऑपरेशन राबविण्यात आले असून या अंतर्गत आरोपींवर कारवाई करण्यात आली आहे.
जिल्ह्यातील गंभीर गुन्ह्यातील आरोपींची तपासणी करून त्यांच्यावर प्रतिबंधाची कारवाई करण्याच्या उद्देशाने पोलीस अधीक्षक जे श्रीधर यांनी जिल्ह्यात विशेष अभियान राबविले. यामध्ये वसमत तालुक्यातील पळशी येथील सराईत गुन्हेगार सुदर्शन शिंदे, योगेश पवार, सचिन शिंदे यांच्यावर दोन वर्षाकरिता जिल्ह्यातून हद्दपारची कारवाई करण्यात आली आहे. त्याचबरोबर हद्दपार असतानाही प्रतिबंधित क्षेत्रात वावरणाऱ्या दोघांवर कारवाई करण्यात आली आहे.
जिल्ह्यातील फरारी आरोपींच्या शोधासाठी पोलीस उपाधीक्षक व सर्व ठाणे अंमलदारांमार्फत कोबींग ऑपरेशन राबविण्यात आले. या अंतर्गत 41 ठिकाणी तपासण्या करण्यात आल्या. ज्यामध्ये अवैध शस्त्र बाळगल्याप्रकरणी स्थानिक गुन्हे अन्वेषण शाखेकडून दोन जणा विरोधात तर हिंगोली शहर पोलिसांकडून एका विरोधात कारवाई करण्यात आली आहे. त्याचबरोबर औंढा येथील पंधरा दिवसांपासून फरार असणाऱ्या दोघांना जेरबंद करण्यात पोलिसांना यश आले आहे. न्यायालयाच्या अटक वारन्ट मधील फरार असणाऱ्या 25 जणांवर पोलिसांनी कारवाई केली असून हिंगोली शहरानजीक लिंबाळा परिसरात संशयितरित्या फिरत असणाऱ्या दोघांविरुद्ध कारवाई करण्यात आली आहे.
