हिंगोली- नगरपरिषदेच्या वतीने माझी वसुंधरा अभियान, शहर सौंदर्यकरण व स्वच्छ सर्वेक्षण अभियान अंतर्गत शहरांमध्ये स्वच्छतेच्या जनजागृती संदर्भात विविध स्पर्धांचे आयोजन करण्यात आले आहे. त्या अनुषंगाने आज नगर परिषदेचे मुख्याधिकारी अरविंद मुंडे यांच्या उपस्थितीत भीतीचित्र स्पर्धेचे आयोजन करण्यात आले. या स्पर्धेमुळे शहराच्या सौंदर्यकरणांमध्ये देखील मोठा फरक पडणार आहे.
नागरिकांमध्ये स्वच्छते संदर्भात जनजागृती निर्माण व्हावी याकरिता नगरपरिषदेच्या वतीने भितीचित्र स्पर्धा, जिंगल स्पर्धा, शॉर्ट मूव्हीज स्पर्धा, स्वच्छतंत्रज्ञान स्पर्धा आदी स्पर्धांचे आयोजन करण्यात आले असून यामध्ये प्रथम, द्वितीय, तृतीय अशी रोख पारितोषिके देखील दिली जाणार आहेत.
त्या अनुषंगाने आज इंदिरा गांधी चौक ते अग्निशामक दल दरम्यान भितीचित्र स्पर्धेचे आयोजन करण्यात आले होते. या स्पर्धेत मोठ्या संख्येने स्पर्धकांनी सहभाग नोंदविला. नागरिकांनी देखील इतर स्पर्धांमध्ये उत्स्फूर्त सहभाग नोंदवावा व हिंगोली शहरामध्ये स्वच्छता निर्माण करण्यासाठी नगर परिषदेला सहकार्य करावे असे आवाहन मुख्याधिकारी अरविंद मुंडे यांनी केले आहे. या स्पर्धेच्या उद्घाटन प्रसंगी मुंडे यांच्यासह नगर अभियंत रत्नाकर आडसिरे, स्वच्छता निरीक्षक राजेश्वर बांगर, सनोबर मॅडम यांची प्रमुख उपस्थिती होती.
