हिंगोली- छत्रपती शिवाजी महाराज यांची तुलना करून अवमान करणाऱ्या राज्यपाल भगतसिंग कोशारी यांच्या विरोधात उद्धव बाळासाहेब ठाकरे शिवसेना पक्षाचे जिल्हाप्रमुख संदेश देशमुख यांच्या नेतृत्वाखाली शिवसैनिकांनी तीव्र घोषणाबाजी करीत कोश्यारी यांचा पुतळा जाळण्याचा प्रयत्न केला. नंतर सेनगाव पोलिसांनी शिवसैनिकांना अटक करून नोटीस बजावत सोडून दिले.
महाराष्ट्राचे राज्यपाल भगतसिंग कोश्यारी यांनी एका कार्यक्रमात छत्रपती शिवाजी महाराज यांची तुलना भाजप नेत्यांशी केली. शिवाजी महाराज हे महाराष्ट्राचे दैवत असून त्यांची बरोबरी जगात कोणीही करू शकत नाही. अशी भावना व्यक्त करीत जिल्हाप्रमुख संदेश देशमुख यांच्या नेतृत्वाखाली सेनगाव येथे आज रविवारी दुपारी कोश्यारी यांच्या विरोधात छत्रपती शिवाजी महाराज चौकात निषेध आंदोलन करण्यात आले.
यावेळी शिवसैनिकांनी कोश्यारी यांचा पुतळा जाळण्याचा प्रयत्न केला. परंतु पोलिसांनी हस्तक्षेप करीत पुतळा ताब्यात घेतला. यावेळी जमलेल्या शिवसैनिकांनी राज्यपालांच्या विरोधात प्रचंड घोषणाबाजी केली.
या आंदोलनामध्ये जिल्हाप्रमुख संदेश देशमुख यांच्यासह तालुकाप्रमुख संतोष देवकर, शहरप्रमुख जगन्नाथ देशमुख, बद्रि कोटकर, विठ्ठलराव शिंदे, जगदीश गाडवे, संतोष गाडवे, वैभव देशमुख, निखिल देशमुख, करण देशमुख, स्वप्निल देशमुख, राहुल वाकळे, अवेज पठाण, चेतन देशमुख, जीवन देशमुख, सुनील शिंदे, दिगंबर देशमुख आदी शिवसैनिकांनी सहभाग नोंदविला. सेनगाव पोलिसांनी सर्व आंदोलकांना ताब्यात घेऊन नंतर नोटीसीवर सोडून दिले. यावेळी उपनिरीक्षक मोकळे, लोकरे, जामदार चव्हाण आदींनी बंदोबस्त राखला.
