हिंगोली- गस्तीवर असणाऱ्या पोलिसांच्या पथकाने संशयित पिकअप गाडीला अडविण्याचा प्रयत्न केला असता गाडीतील आरोपींनी पोलिसांवर तुफान दगडफेक केली. यावेळी बचावासाठी पोलिसांनी हवेत गोळीबार केल्याची घटना वसमत शहरातील पोलीस वसाहत नजीक आज 10 डिसेंबर रोजी पहाटे पहाटे 5 च्या सुमारास घडली.
वसमत शहर पोलिसांचे पथक शुक्रवारी रात्रीपासून गस्तीवर होते. हे पथकात शनिवारी पहाटे साडेचारच्या सुमारास पोलीस वसाहत नजीक असताना संशयित पिकअप जात असल्याचे निदर्शनास आले. यावेळी पोलिसांनी पिकअप थांबविण्याचा प्रयत्न केला. पिकअप चालकाने गती कमी केली आणि अचानक पिकप मधून पोलिसांवर दगडफेक सुरू झाली. या दगडफेकीमध्ये पोलीस कर्मचारी शिवाजी पतंगे यांच्या डोक्याला दगड लागून गंभीर दुखापत झाली.
यावेळी गस्ती पथकामधील पोलीस अधिकारी बाबासाहेब खार्डे यांनी आपल्या रीवाल्वर मधून हवेत गोळीबार केला. गोळीबार ऐकताच आरोपींनी घटनास्थळावरून पिकअप सह धूम ठोकली.
पोलिसांनी पिकअपचा पाठलाग सुरू केला. सदर पिकअप आसेगाव मार्गे नांदेड जिल्ह्यातील लिंबगाव परिसरात भरधाव वेगात पलटला. पिकअप पलटताच गाडीतील आरोपी फरार झाले. घटनास्थळी पोलीस पोहचले असता सदर पिकअप मध्ये अवैधरित्या पाच गाई कोंबून नेण्यात येत असल्याचे निदर्शनास आले. यातील काही गाय पिकअप उलटल्यामुळे जखमी देखील झाल्या आहेत. पोलिसांनी जखमी गाईंना गोशाळेमध्ये रवाना केले. दरम्यान पिकप मध्ये काचेच्या गोट्या, गुलेर, दगड भरून ठेवलेली पोते असे साहित्य आढळून आले.
जनावरांच्या तस्करीचा संशय
उलटलेल्या पीकअपच्या समोरील बाजूस वेगळा नंबर व मागील बाजूस वेगळ्या नंबरची प्लेट आढळून आली आहे. त्याचबरोबर पिकअपच्या आत मध्ये देखील अशाच प्रकारच्या वेगवेगळ्या क्रमांकाच्या नंबर प्लेट असल्याचे निदर्शनास आले आहे. यावरून हा प्रकार अवैधरित्या जनावरांची वाहतूक, तस्करी अथवा चोरी करण्याचा प्रकार असावा असा प्राथमिक अंदाज व्यक्त केल्या जात आहे. दरम्यान फरार आरोपींचा तपास वसमत पोलिसांच्या वतीने सुरू आहे. घटनास्थळी अप्पर पोलीस अधीक्षक अर्चना पाटील, उपविभागीय पोलीस अधिकारी किशोर कांबळे, पोलीस निरीक्षक चंद्रशेखर कदम यांनी भेट देऊन पाहणी केली.
