काही नवीन नेते ओबीसींची लायकी काढत आहेत. त्यांनी केंद्रीय लोकसेवा आयोग, महाराष्ट्र लोकसेवा आयोग यांच्या भरती मधील ओबीसी विद्यार्थ्यांचे टक्केवारी तपासावी जी खुल्या प्रवर्गातील विद्यार्थ्यांच्या बरोबरीत आहे. त्यामुळे आमची लायकी कुठल्या मुद्द्यावर सिद्ध करणार ? असा प्रश्न उपस्थित करताना त्यांनी विविध जातींमधील संतांच्या नावांचा देखील उल्लेख करताना अप्रत्यक्षपणे जरांगे यांना टोला लगावला. सारथीच्या माध्यमातून सरकारने मराठा समाजासाठी मोठा निधी उपलब्ध करून दिला. अण्णासाहेब पाटील महामंडळाच्या माध्यमातून 70 हजार मराठा तरुणांसाठी पाच हजार कोटी रुपये उपलब्ध करून दिले. त्यांना देण्याबद्दल आमचा आक्षेप नाही. परंतु याच पद्धतीने ओबीसी महामंडळ व महाज्योती यासाठी देखील समप्रमाणात निधी उपलब्ध करून द्या. सर्वेक्षण करून मराठा समाजाचे मागासले पण सिद्ध होणार नाही. त्यासाठी इतर जातींचा तुलनात्मक आलेख समोर येणे गरजेचे आहे आणि हे करायचे असेल तर सरकारने बिहार प्रमाणे महाराष्ट्रात तात्काळ जनगणना करावी त्यानंतर जे समोर येईल ते आम्ही मान्य करू असा दावा देखील भुजबळ यांनी यावेळी केला. या सभेला प्रकाश अण्णा शेंडगे, टी.पी.मुंडे, महादेव जानकर, आमदार प्रज्ञा सातव, आमदार राजेश राठोड, बि. डी. चव्हाण, समीर भुजबळ, खासदार रामदास तडस, माजी आमदार रामराव वडकुते, सचिन नाईक, सुरेशअप्पा सराफ, एड. रवी शिंदे, लक्ष्मण गायकवाड, बबनराव तायवाडे आदींची उपस्थिती होती.
