हिंगोली- लोकसभेच्या निवडणुकीत महाविकास आघाडी व महायुतीच्या उमेदवारांकडून जोरदार प्रचार सुरू असला तरी या प्रचारामध्ये दोन्ही बाजूच्या संपर्कप्रमुखांच्या बाबतीत देखील तेवढीच चर्चा रंगू लागली आहे.
शिवसेना पक्ष फुटण्यापूर्वी या जिल्ह्याचे संपर्कप्रमुख म्हणून बबन थोरात यांनी कारभार सांभाळलेला होता. त्यामुळे थोरात यांना हिंगोली लोकसभेच्या बाबतीतला पूर्व इतिहास माहित आहे. थोरात यांच्यानंतर आनंदराव जाधव हे हिंगोली जिल्ह्याचे संपर्कप्रमुख झाले. पक्ष फुटी नंतर जाधव यांनी शिंदे गटाचा रस्ता धरला आणि पुन्हा हिंगोली संपर्कप्रमुख झाले तर दुसरीकडे उद्धव ठाकरे यांनी बबन थोरात यांच्यावर विश्वास टाकत हिंगोलीची धुरा त्यांच्या हाती सोपवली. महायुतीचे एकनाथ शिंदे गटाचे उमेदवार बाबुराव कदम यांच्या प्रचाराची मुख्य धुरा संपर्कप्रमुख आनंदराव जाधव यांच्या हातात आहे. संपर्कप्रमुख पद मिळाल्यानंतर जाधवांनी हिंगोली जिल्ह्यातील पक्ष संघटन वाढवण्यावर फारसा भर दिला नाही. ज्याचे परिणाम आज लोकसभा निवडणुकीच्या प्रचारात दिसून येत आहेत. एकनाथ शिंदे शिवसेना गटाकडे स्वतःची अशी तुल्यबळ यंत्रणा नाही जे काही चालू आहे ते भाजप भरोसे म्हणावे लागेल. भाजपचे नेते मंडळी केवळ वरिष्ठांचा आदेश म्हणून कदम यांच्या प्रचारात आहे परंतु संपर्कप्रमुख म्हणून या भाजप नेत्यांना आपलेसे करण्यात जाधवांना यश आलेले नाही. पक्ष संघटनेतील संपर्कप्रमुख असे महत्त्वाचे पद असतानाही जाधवांना त्याची व्याप्ती समजली नाही. ज्याचे परिणाम या निवडणुकीत उमेदवार कदम यांना भोगावे लागू शकतात.
दुसरीकडे उद्धव बाळासाहेब ठाकरे शिवसेना गटाचे संपर्कप्रमुख बबन थोरात यांनी आधीपासूनच नागेश पाटील आष्टीकर यांना मतदारसंघात फिरविले होते. प्रमुख इच्छुक म्हणून त्यांच्या नावाची चर्चा घडवून आणली होती. त्यानंतर उद्धव ठाकरे यांनी अष्टीकर यांची उमेदवारी जाहीर केली. थोरात यांनी पूर्वीपासूनच गावपातळीपर्यंत कार्यकर्त्यांची फळी तयार ठेवली असल्यामुळे आजच्या प्रचार यंत्रणेमध्ये त्याचा त्यांना मोठा लाभ होत आहे. एवढेच नव्हे तर मित्र पक्षातील नेत्यांच्या नाराजी दूर करून त्यांना प्रत्यक्ष प्रचारात उतरविण्याची कलादेखील थोरात यांनी साध्य केली.
शिवाय महायुतीमध्ये भाजपच्या नाराजीचा फायदा उठवण्याच्या दृष्टिकोनातून थोरात यांनी अनेक राजकीय डाव खेळल्याचे देखील बोलल्या जात आहे.
दोन्ही बाजूचे दोन संपर्कप्रमुख दोन्ही उमेदवारांचे कारभारी आहेत. परंतु थोरात यांची खेळी मात्र जाधव यांना मात देणारी ठरणार असल्याचे चित्र दिसून येत आहे.
