हिंगोली जिल्ह्यांमध्ये कायदा व सुव्यवस्था अबाधित ठेवण्यासाठी विशेषतः शाळेतील विद्यार्थिनींना सुरक्षा देण्याच्या उद्देशाने पोलीस दीदी व पोलीस काका उपक्रम प्राधान्याने राबविणार असून जिल्ह्यातील सर्व पोलीस ठाण्यांमध्ये वसाहतीच्या सुविधा कर्मचारी व अधिकाऱ्यांसाठी निर्माण करण्याकरिता प्रयत्न करणार असल्याचे प्रतिपादन पोलीस अधीक्षक श्रीकृष्ण कोकाटे यांनी केले.
हिंगोली पोलीस अधीक्षक म्हणून पदभार स्वीकारल्यानंतर त्यांनी प्रथमच पत्रकारांची संवाद साधला. हिंगोली जिल्ह्यात ज्या पोलीस स्थानकांमध्ये संवेदनशील ठिकाण आहे अशा ठिकाणी विशेष लक्ष देऊन गुन्ह्यांचे प्रमाण कसे कमी करता येईल यावर अधिक भर देण्यात येणार आहे. पोलीस स्थानकांच्या ठिकाणी जुन्या इमारती तसेच कर्मचारी व अधिकाऱ्यांकरिता निवासाच्या सुविधा पुरेशा नाहीत या बाबी लक्षात घेऊन नवीन पोलीस ठाण्यात इमारती व निवास व्यवस्था निर्माण करण्याकडे लक्ष दिल्या जाईल.
जिल्ह्यातील विद्यार्थिनींना संरक्षण देण्याच्या उद्देशाने पोलीस दीदी व पोलीस काका उपक्रम नव्याने हाती घेण्यात येणार आहे. त्यानुसार शाळांमध्ये जाऊन पोलीस कर्मचारी त्यांना विश्वासात घेऊन संपर्क साधतील. तसेच सदरील कर्मचाऱ्यांचे संपर्क क्रमांक देखील शाळेत उपलब्ध करून देण्यात येणार आहे. हिंगोली शहरातील वाहतुकीच्या संदर्भात हिंगोली नगरपालिकेसोबत चर्चा करून वाहतूक सुरळीत करण्याबाबत देखील उपाय योजना करण्यात येणार असल्याची माहिती यावेळी त्यांनी दिली. या पत्रकार परिषदेला सुधीर वाघ, स्थानिक गुन्हे शाखेचे गुन्हे शाखेचे पोलीस निरीक्षक विकास पाटील, उपनिरीक्षक शिवशंभ घेवारे, सहाय्यक पोलीस निरीक्षक मलपिल्लू यांची उपस्थिती होती.
