हिंगोली- भारतीय जनता पार्टीचे नेते रामदास पाटील यांनी आज पत्रकार परिषदेत घेत आपण भारतीय जनता पार्टीच्या प्राथमिक सदस्यत्वाचा राजीनामा देत विधानसभा निवडणुकीत अपक्ष म्हणून निवडणूक लढविणार असल्याचे जाहीर केल्यामुळे राजकीय वर्तुळात खळबळ उडाली आहे.
रामदास पाटील यांनी आज त्यांच्या जनसेवा संपर्क कार्यालयात पत्रकार परिषद घेतली. विधानसभा निवडणुकीमध्ये त्यांनी यापूर्वीच अपक्ष म्हणून उमेदवारी अर्ज दाखल केला होता. त्यामुळे ते अर्ज कायम ठेवतील की माघार घेतील याबाबत मोठी चर्चा सुरू होती. या पार्श्वभूमीवर आज रामदास पाटील यांनी पत्रकार परिषदेत आपण पक्षाच्या प्राथमिक सदस्यत्वाचा राजीनामा दिल्याची घोषणा केली. ही घोषणा करताना त्यांनी विद्यमान आमदार तानाजी मुटकुळे यांच्यावर अनेक गंभीर स्वरूपाचे आरोप केले. जिल्ह्यामध्ये होत असलेल्या जलजीवनच्या कामात मोठा भ्रष्टाचार होत असल्याचा आरोप केल्यानंतर मुटकुळे यांनी संबंधित सरपंचांवर दबाव आणून त्यांना आपले काम करण्यासाठी बांधील केल्याचा आरोप त्यांनी केला. हिंगोली नगरपालिकेमध्ये झालेल्या विकास कामांचे श्रेय नगरसेवकांना देण्याऐवजी ते श्रेय स्वतःकडेच घेतल्याचा आरोप देखील त्यांनी केला. पक्षांतर्गत बूथ लेवल पर्यंत काम करणाऱ्या विविध पदाधिकारी आणि कार्यकर्त्यांना बळ देण्याचे काम मुटकुळे यांनी कधीही केले नाही. मतदार संघातील अनेक गावांमध्ये भांडणे लावण्याचे काम त्यांनीच केले. कृषी उत्पन्न बाजार समितीमध्ये विरोधकांसोबत हात मिळवणी करून अभद्र स्वरूपाची युती देखील करण्यात आली परंतु सर्वसामान्य कार्यकर्त्यांनी त्यांचा सगळा मनसुबा उधळून लावला. लोकसभा निवडणुकीमध्ये तानाजी मुटकुळे हे स्वतः उमेदवारीसाठी इच्छुक होते. परंतु ते शक्य न झाल्यानंतर त्यांनी बाबुराव पाटील यांना उभे केले. प्रत्यक्षात मात्र त्यांच्या विजयासाठी मुटकुळे यांनी कुठलेही योगदान दिले नाही असा गंभीर आरोप देखील यावेळी रामदास पाटील यांनी केला.
डावे आणि उजवे मराठा यांच्या नावावर मुटकुळे आणि गोरेगावकर यांनी राजकारण केले. प्रत्यक्षात या दोन्हीही समाजातील कार्यकर्ते किंवा नेत्यांना मोठे होण्यासाठी दोघांनीही काहीही केलेले नाही. गोरेगावकर यांचे पंधरा वर्षे आणि मुटकुळे यांचे दहा वर्ष हे केवळ मतदारसंघातील राजकारण खेळण्यामध्ये गेले आहे. त्यामुळे कंटाळलेली जनता माझ्या पाठीशी राहणार असून महाराष्ट्रातील मोठ्या मताधिक्यांनी अपक्ष म्हणून निवडून येणारी ही माझी जागा असेल असा विश्वास देखील त्यांनी यावेळी व्यक्त केला.
