हिंगोली – जिल्हा परिषद बांधकाम विभागातील कारभार पुन्हा एकदा चर्चेच्या केंद्रस्थानी आला असून, प्रशासकीय पदावर कार्यरत असलेला अधिकारी थेट तांत्रिक संचिकांवर स्वाक्षऱ्या आणि टिप्पणी करत असल्याचा गंभीर प्रकार समोर आला आहे. अधिकारक्षेत्राच्या स्पष्ट मर्यादा असतानाही हा प्रकार सुरू असल्याने विभागातील शिस्त आणि कार्यपद्धतीवरच प्रश्नचिन्ह निर्माण झाले आहे.
नियमाप्रमाणे बांधकाम विभागातील तांत्रिक संचिका संबंधित तांत्रिक अधिकारी (श्रेणी १, २ किंवा ३) तसेच लेखाधिकारी यांच्या तपासणीनंतरच कार्यकारी अभियंत्यांकडे सादर केल्या जातात. मात्र गेल्या काही दिवसांपासून प्रशासकीय जबाबदारीसाठी रुजू झालेला एक अधिकारी स्वतःला सर्वेसर्वा समजून थेट तांत्रिक संचिकांवर स्वाक्षरी व निरीक्षण नोंदवत असल्याचे उघड झाले आहे.
शासकीय नियमांनुसार कोणताही अधिकार नसताना हा हस्तक्षेप नेमक्या कोणत्या उद्देशाने केला जात आहे, याबाबत प्रशासनात संभ्रमाचे वातावरण आहे. संबंधित अधिकाऱ्याच्या मनमानी आणि हेकेखोर वृत्तीमुळे विभागातील अनेक कर्मचारी वैतागले असून, कामकाजावर त्याचा विपरीत परिणाम होत असल्याची चर्चा रंगू लागली आहे.
यामुळे प्रशासकीय आणि तांत्रिक कार्यपद्धतीतील सीमारेषा धूसर होत असून, जबाबदाऱ्यांची गल्लत होत असल्याचे चित्र आहे. अशा प्रकारामुळे भविष्यातील कामकाजात गोंधळ निर्माण होण्याची शक्यता नाकारता येत नाही. त्यामुळे वरिष्ठ अधिकाऱ्यांनी तातडीने हस्तक्षेप करून संबंधित प्रकाराची चौकशी करावी आणि नियमबाह्य हस्तक्षेपावर लगाम लावावा, अशी मागणी जोर धरत आहे.
(बातमीत वापरले चित्र प्रातिनिधिक ए आय आधारित आहे)
