मुंबई- मुंबई बँक असोशिएशनच्या संचालकपदी हिंगोलीचे माजी नगराध्यक्ष तथा नागनाथ बॅंकेचे संचालक दिलीप चव्हाण यांची बहुमताने निवड झाली आहे. त्यांच्या निवडीमुळे मराठवाडयातील अर्बन बँकेचे प्रश्न तातडीने मार्गी लागणार आहे.
मुंबई बँक असोशिएशनच्या संचालकांच्या दोन जागासाठी तीन उमेदवार निवडणूक रिंगणात होते. यामध्ये हिंगोलीचे माजी नगराध्यक्ष तथा नागनाथ बँकेचे संचालक दिलीप चव्हाण, सुंदरलाल सावजी बँकेचे मुकूंद कळमकर तर औरंगाबाद येथील रवींद्र काळे यांनी उमेदवारी दाखल केली होती.
त्यानंतर नांदेड व औरंगाबाद येथील मतदान केंद्रावर मतदान घेण्यात आले. यामध्ये ३७ पैकी ३४ मतदारांनी मतदान केले. त्यानंतर आज मुंबई येथे असोशिएशनच्या कार्यालयात मतमोजणी झाली. यामध्ये दिलीप चव्हाण यांना सर्वात जास्त २६ मते मिळाली तर मुकूंद कळमकर यांना २१ मते मिळाली. रवींद्र काळे यांना १८ मते मिळाली आहेत.
हिंगोलीचे दिलीप चव्हाण यांना प्रशासकीय व बँकींग क्षेत्रातील अनूभव लक्षात घेऊन मतदारांनी त्यांना सर्वात जास्त मतांनी विजयी केले. त्यांच्या निवडीबद्दल अभिनंदन केले जात आहे.
संघटनेच्या माध्यमातून अर्बन बँकेचे प्रश्न सोडवणार : दिलीप चव्हाण, नवनिर्वाचित संचालक
मतदारांनी मोठ्या संख्येने मतदान देऊन आपल्यावर टाकलेला विश्वास सार्थ ठरवणार आहे. मराठवाड्यातील अर्बन बँकांसह इतर बँकांचे प्रश्न संघटनेच्या माध्यमातून मार्गी लावण्यासाठी प्रयत्न करणार आहे.
