हिंगोली – गेल्या अनेक वर्षांपासून हिंगोलीकरांची मागणी असलेली थेट मुंबई रेल्वे अखेर लोकसभा निवडणुकीच्या तोंडावर केंद्र सरकारने मंजूर करीत जालना येथून धावणारी जनशताब्दी एक्सप्रेस 8 मार्च पासून हिंगोली येथून धावणार असल्याचे जाहीर केले. यासंदर्भातची माहिती खासदार हेमंत पाटील यांनी हिंगोली येथील पत्रकार परिषदेत दिली.
हिंगोली येथून थेट मुंबईला जाण्यासाठी रेल्वे असावी याकरिता हिंगोलीकरांनी अनेक वेळा निवेदने दिली. त्याचबरोबर रेल्वे रोको आंदोलन देखील करण्यात आले होते. याबाबत खासदार हेमंत पाटील यांनी केंद्रीय रेल्वे राज्यमंत्री रावसाहेब दानवे यांच्याकडे पाठपुरावा केल्यानंतर दानवे यांनी जालना ते मुंबई धावणारी जनशताब्दी एक्सप्रेस हिंगोली येथून सोडण्यास मंजुरी दिली. 8 मार्चपासून ही रेल्वे हिंगोली येथून धावणार आहे. रेल्वेचे वेळापत्रक अद्याप जाहीर झाले नसले तरी ही रेल्वे हिंगोली येथून सकाळी पाच वाजता निघून दुपारी दोन वाजता मुंबई येथे पोहोचणार आहे. त्यामुळे हिंगोलीकरांना मुंबई आता काही तासाच्या अंतरावर आली आहे. सदर रेल्वेला केंद्रीय राज्यमंत्री रावसाहेब दानवे यांच्यासह राज्याचे मुख्यमंत्री एकनाथ शिंदे उपमुख्यमंत्री देवेंद्र फडणवीस व अजित दादा पवार यांच्या हस्ते झेंडा दाखवून सुरुवात करण्यात येणार आहे. हिंगोलीकरांसाठी ही मोठी उपलब्ध असून गेल्या अनेक वर्षांची मागणी पूर्ण करण्यात यश आले याबाबत समाधान वाटत असल्याची भावना व्यक्त करताना केंद्रीय रेल्वे राज्यमंत्री रावसाहेब दानवे यांचे आभार देखील खासदार हेमंत पाटील यांनी मानले.
