हिंगोली – महाविकास आघाडीतून शिवसेना उद्धव ठाकरे गटाचे उमेदवार नागेश पाटील आष्टीकर यांनी जोरदार शक्ती प्रदर्शन करीत आपला उमेदवारी अर्ज दाखल केला.
हिंगोली येथील इंदिरा गांधी चौकात महाविकास आघाडीच्या वतीने भव्य सभेचे आयोजन करण्यात आले होते. यावेळी व्यासपीठावर माजी मंत्री शिवाजीराव मोघे, विरोधी पक्ष नेते आंबादास दानवे, संपर्कप्रमुख बबनराव थोरात, माजी आमदार जयप्रकाश मुंदडा, भाऊराव पाटील गोरेगावकर, माजी नगराध्यक्ष दिलीप चव्हाण, शिवसेना जिल्हाप्रमुख गोपु पाटील, संदेश देशमुख यांच्या सह इतर मान्यवर उपस्थित होती.
यावेळी नागेश पाटील आष्टीकर यांनी आपल्या भाषणातून भाजप आणि शिवसेना शिंदे गटावर जोरदार टीका केली. देशात महागाई वाढलेली असताना भाजप मात्र पक्ष फोडा फोडी मध्ये व्यस्त आहे. बेरोजगारी मोठ्या प्रमाणात वाढली असून तरुणांना रोजगार मिळत नाही. या प्रश्नांकडे दुर्लक्ष करून देशातील संविधान संपविण्याचे कारस्थान भाजपकडून सुरू आहे. मी एक सर्वसामान्य कार्यकर्ता आहे आणि कार्यकर्ता राहील. महाविकास आघाडीतील प्रत्येक कार्यकर्ता या निवडणुकीत उमेदवार आहे. त्यामुळे या निवडणुकीत आपण प्रचंड मताधिक्यांनी विजयी होऊ असा विश्वास अष्टीकर यांनी व्यक्त केला.
याप्रसंगी विरोधी पक्षनेते अंबादास दानवे यांनी विरोधकांवर कडाडून टीका करताना जनतेने अष्टीकरांच्या पाठीशी उभे राहून प्रचंड मतांनी निवडून देण्याचे आवाहन केले. याचबरोबर जिल्हा संपर्कप्रमुख बबन थोरात यांनी आपल्या शैलीमध्ये विरोधकांचा समाचार घेतला. गद्दारांना कुठे जागा नसते हे आजच्या परिस्थितीवरून सिद्ध झाले आहे. उरलेला हिशोब जनता चुकती करेल असा विश्वास देखील त्यांनी यावेळी व्यक्त केला. या सभेला ठिकठिकाना वरून मोठ्या संख्येने कार्यकर्ते उपस्थित होते.
