हिंगोली- मराठवाड्यातील क्षेत्रफळाने छोटा समजला जाणाऱ्या हिंगोली जिल्ह्याला गेल्या अनेक वर्षांपासून मंत्रीपदाची प्रतीक्षा राहिलेली आहे. यंदाच्या मंत्रिमंडळात तरी जिल्ह्यातील आमदाराची वर्णी लागेल काय? असा प्रश्न जिल्ह्यातील नागरिकांना पडला आहे.
यंदाच्या विधानसभा निवडणुकीमध्ये हिंगोली जिल्ह्यातील मतदारांनी महायुतीच्या उमेदवारांच्या पदरात भरभरून मतदानाचे माप टाकले.
हिंगोली विधानसभेचे आमदार तानाजी मुटकुळे यांना जनतेने सलग तिसऱ्यांदा संधी दिली. मागील दहा वर्षात मुटकुळे यांनी विकासाच्या अनुषंगाने महत्त्वपूर्ण काम केले. त्या पार्श्वभूमीवर भारतीय जनता पार्टीमध्ये मंत्री म्हणून नवा चेहरा देण्याच्या बाबतीत विचार होईल काय? याबाबत भारतीय जनता पार्टीच्या कार्यकर्त्यांमध्ये उत्कंठा निर्माण झाली आहे. मराठवाडा विभागाचा विचार केला तर विभागात भाजपमध्ये अनेक ज्येष्ठ आणि दिग्गज मंडळी प्रतीक्षा यादीत आहेत. परंतु नवा चेहरा म्हणून पक्षाने मुटकुळे यांना संधी द्यावी अशी आग्रहाची भावना कार्यकर्त्यांमध्ये आहे.
माजी खासदार हेमंत पाटील यांना एकनाथ शिंदे यांनी विधान परिषदेवर संधी देऊन त्यांचे पुनर्वसन केले आहे. शिवाय हळद संशोधन केंद्राचे अध्यक्ष म्हणून त्यांना राज्यमंत्री पदाचा दर्जा देखील बहाल केला आहे. राजकारणातील अभ्यासू व्यक्तिमत्व म्हणून हेमंत पाटील ओळखले जातात. शिवाय एकनाथ शिंदे आणि श्रीकांत शिंदे यांच्या अतिशय विश्वासातील व्यक्ती म्हणून देखील हेमंत पाटील यांची ओळख आहे. एवढेच नव्हे तर विधानसभा निवडणुकीमध्ये नांदेड जिल्ह्यातील तीन विधानसभा मतदारसंघांमध्ये शिंदे गटासाठी विजय खेचून आणण्यात हेमंत पाटील यांची महत्त्वपूर्ण भूमिका राहिलेली आहे. या पार्श्वभूमीवर शिंदे गटाच्या मंत्री कोट्यातून हेमंत पाटील यांची वर्णी लागण्याची शक्यता व्यक्त केली जात आहे.
वसमत विधानसभे मधून आमदार राजू भैया नवघरे यांना जनतेने सलग दुसऱ्यांदा पसंती दिली आहे. युवा चेहरा आणि दमदार नेतृत्व म्हणून अजितदादा गटातील आमदारांमध्ये त्यांची ओळख आहे. राजकारणात दिग्गज मानले जाणारे आणि नवघरे यांचे गुरु जयप्रकाश दांडेगावकर यांचा पराभव करून नवघरे यांनी मोठा पराक्रम केला आहे. मराठवाड्यातील त्यांचा हा विजय अजित पवार गटासाठी उल्लेखनीय ठरणारा आहे. या पराक्रमाबद्दल अजित पवार गटातून त्यांना मंत्रीपदाची संधी मिळावी अशी भावना व्यक्त होऊ लागली आहे.
कळमनुरी विधानसभेकडे संपूर्ण मराठवाडा विभागाचे लक्ष होते. ज्यामध्ये खुद्द उद्धव ठाकरे यांनी कळमनुरी मतदार संघा संघात सभा देखील घेतली होती. परंतु सर्व विरोधाला पुरून उरत संतोष बांगर यांनी सलग दुसऱ्यांदा बाजी मारली आहे. शिंदे गटातील आक्रमक चेहरा म्हणून बांगर ओळखल्या जातात. भविष्यातील शिंदे गटाचे राजकारण पाहता संतोष बांगर यांच्यासारख्या आक्रमक चेहऱ्याला मंत्रिपदाची संधी दिल्यास त्याचा मराठवाडा विभागामध्ये पक्षाला मोठा फायदा होईल अशी भावना शिवसैनिकांमध्ये जोर धरत आहे. या तीनही आमदारांचा विचार करता महायुती सरकारमधील तीन पैकी किमान एका पक्षाने तरी जिल्ह्याला यावेळी मंत्रिमंडळात नेतृत्व करण्याची संधी द्यावी अशी तमाम जिल्हा वासियांची भावना आहे. तत्कालीन आमदार जयप्रकाश दांडेगावकर यांना शरद पवारांनी राज्याचे सहकार राज्यमंत्री म्हणून संधी दिली होती. त्यानंतर आजपर्यंत जिल्ह्याला स्वतःचा पालकमंत्री लाभलेला नाही. ही भावना लक्षात घेऊन महायुतीतील पक्षांनी यावेळी तरी जिल्ह्याचा मंत्रीपदाचा अनुशेष दूर करावा अशी इच्छा व्यक्त होऊ लागली आहे.
