हिंगोली- गेल्या अनेक दिवसांपासून माजी आमदार भाऊराव पाटील गोरेगावकर यांच्या विविध पक्षातील प्रवेशाच्या शक्यतांना अखेर पूर्णविराम मिळाला. गोरेगाव येथे झालेल्या समर्थकांच्या बैठकीत भाऊराव पाटील गोरेगावकर यांनी 14 ऑक्टोबर रोजी मुंबई येथे एकनाथ शिंदे यांच्या उपस्थितीमध्ये शिवसेना पक्षात प्रवेश करणार असल्याची घोषणा केली.
हिंगोली विधानसभेचे तब्बल तीन वेळा आमदार म्हणून कार्यकाळ पार पडलेल्या भाऊराव पाटील गोरेगावकर यांना विधानसभा निवडणुकीत पराभव पत्करावा लागला. काँग्रेस पक्षाचे निष्ठावानेते म्हणून त्यांच्या परिचय असताना यंदाच्या विधानसभा निवडणुकीत पक्षाने ऐनवेळी जागा उद्धव बाळासाहेब ठाकरे शिवसेना गटाला सोडून दिली. त्यानंतर कार्यकर्त्यांच्या आग्रहाखातर भाऊराव पाटील गोरेगावकर यांनी अपक्ष निवडणूक लढविली. निवडणुकीनंतर येणाऱ्या स्थानिक स्वराज्य संस्थांच्या निवडणुकीच्या पार्श्वभूमीवर त्यांचा अजित दादा पवार राष्ट्रवादी काँग्रेस पक्षात प्रवेश होणार असल्याची जोरदार चर्चा सुरू होती. त्यापूर्वी देखील त्यांची शिवसेना शिंदे गटात प्रवेश होण्यासंदर्भात चर्चा झाली होती. परंतु गेल्या काही दिवसात राष्ट्रवादी काँग्रेस अजित पवार गटाशी चर्चा विनिमय सुरू होते. परंतु गोरेगावकर यांचे विरोधक असलेले प्रकाश थोरात, अनिल पतंगे या व इतर मंडळींकडून गोरेगावकर यांच्या प्रवेशाच्या बाबतीत मोठा विरोध राष्ट्रवादी काँग्रेस पक्षात निर्माण झाला होता. त्यामुळे गोरेगावकर काय निर्णय घेतात याकडे सर्वांचे लक्ष लागले होते. त्यातच दोन दिवसांपूर्वी आमदार संतोष बांगर यांनी गोरेगावकर यांच्या निवासस्थानी भेट दिल्यानंतर मोठ्या चर्चांना वेग आला होता. या पार्श्वभूमीवर त्यांनी आज गोरेगाव येथे समर्थकांची बैठक घेऊन प्रवेशाच्या बाबतीत चर्चा केल्यानंतर अखेर दिनांक 14 ऑक्टोबर रोजी मुंबई येथे आजी-माजी जिल्हा परिषद सदस्य, पंचायत समिती सदस्य, संचालक यांच्यासह शिवसेना शिंदे गटात प्रवेश करणार असल्याचे निश्चित झाले आहे.
स्थानिक स्वराज्य संस्थेत भगवा फडकवू
कार्यकर्त्यांच्या बैठकीनंतर पत्रकारांशी बोलताना भाऊराव पाटील गोरेगावकर म्हणाले की कार्यकर्त्यांच्या भावना जाणून घेतल्यानंतर आपण हा प्रवेशाचा निर्णय घेतलेला आहे. आगामी नगरपालिका, जिल्हा परिषद निवडणुकांमध्ये शिवसेनेचा भगवा फडकविणार असल्याचा विश्वास त्यांनी व्यक्त केला.
