हिंगोली- काळ्या बाजारात विक्रीसाठी नेण्याकरिता आरोपीने घरासमोरील वाहनात साठवून ठेवलेला धान्यसाठा गुन्हे शाखेच्या पथकाने कारवाई करून जप्त केला. ही कारवाई गुरुवारी रात्री करण्यात आली.
सेनगाव येथील सय्यद लतीफ सय्यद इसा याने आपल्या घरासमोरील पिकप मध्ये काळ्या बाजारात विक्रीकरिता नेण्यासाठी धान्यसाठा केल्याची माहिती मिळाल्यानंतर स्थानिक गुन्हे अन्वेषण शाखेच्या पथकाने कारवाई करीत 21 हजार रुपयांचा 29 पोत्यात साठविलेला धान्यसाठा जप्त केला आहे. त्याचबरोबर महिंद्रा पिकप वाहन देखील जप्त करण्यात आले असून एकूण दोन लाख 21 हजारांचा मुद्देमाल जप्त करण्यात आला आहे.
गुन्हे शाखेचे कर्मचारी संभाजी लेकुळे यांच्या फिर्यादीवरून सेनगाव पोलिसात आरोपीविरुद्ध गुन्हा दाखल करण्यात आला आहे. पोलीस अधीक्षक जी श्रीधर, अप्पर पोलीस अधीक्षक अर्चना पाटील, पोलीस निरीक्षक उदय खंडेराय यांच्या मार्गदर्शनाखाली गुन्हे शाखेचे सपोनी शिवसांब घेवारे, पोलीस अंमलदार संभाजी लेकुळे, गजानन पोकळे, लिंबाजी वाहुळे, गणेश लेकुळे, ज्ञानेश्वर पायघन, प्रशांत वाघमारे यांनी या कारवाईत सहभाग नोंदविला.
