हिंगोली- मुंबई उच्च न्यायालयाच्या औरंगाबाद खंडपीठ येथे परभणी जिल्ह्यातील पोलीस विभागातील 30 जून ते 31 डिसेंबर रोजी सेवानिवृत्त झालेल्या अधिकारी व कर्मचाऱ्यांनी याचिका दाखल करत पुढील वर्षी एक जुलै व एक जानेवारी रोजी मिळणारी वार्षिक वेतन वाढ आणि निवृत्ती भक्ता व इतर लाभ मिळण्यासंदर्भात मुद्दा उपस्थित केला होता.
राज्यातील सर्व खात्यातील कर्मचाऱ्यांना सदरील वार्षिक वेतन वाढ, निवृत्तीवेतन, निवृत्ती भत्ता इत्यादी लाभांची गणना अदा करणे बंधनकारक असताना सदरची मागणी संबंधित जिल्ह्याचे पोलीस अधीक्षक यांनी फेटाळल्याने याचिकाकर्त्यांनी न्यायालयात धाव घेत ऍड. विवेक उत्तमराव राठोड लोहरेकर यांच्यामार्फत औरंगाबाद खंडपीठ येथे याचिका दाखल केली. सदर याचिकेवर 2 जानेवारी 2023 रोजी अंतिम सुनावनी न्यायमूर्ती रवींद्र घुगे व न्यायमूर्ती संजय देशमुख यांच्या खंडपीठांसमोर पार पडली.
दोन्ही पक्षाच्या वकिलांचा युक्तिवाद ऐकल्यानंतर न्यायालयाने सदर याचीकाकर्त्यांचे वार्षिक वेतन वाढ, निवृत्ती वेतन व निवृत्ती भत्ता लाभा संदर्भातील वाद निकाली काढला असून सदरचा लाभ 28 फेब्रुवारी 2023 पर्यंत अदा करण्यासंदर्भात संबंधित अधिकाऱ्यांना आदेशित केले आहे.
सदरील प्रकरणात एड. विवेक उत्तमराव राठोड यांना ऍड. विनोद अंभोरे यांनी सहाय्य केले. या निकालामुळे परभणी जिल्ह्यातील सुमारे 17 याचिकाकर्त्यांना दिलासा मिळाला आहे.
